Zoeken
  • Carnavalsvereniging de Doorzetters

Nieuwsbrief d.d. 15-12-2021


15 desember 2021 Leef Doorzetters en Doorzetterinnekes, Veer hadde gehaup dat veer vanaaf de 11de van de 11de weer hadde kinne beginne aan un sjoon nuuj vastelaovesseizoen. Mer dat angere virus gooide om vief veur twelluf toch weer roet in ut eate. Alles en ederein sjting in de sjtartblokke om dr weer es vanouds teagenaan te goan. Wie ut noe de kommende tied oet geit zeen weite veer auch neet gans. Wat veer waal weite is dat veer os neet klein loate kriege en os aanpasse aan wat waal moag. Doarom zulle achter de sjerme weer een boel luuj bezig zeen met ut verzinnen van alternatieve en angere ideeje om de vastelaovend toch weer sjus wie veurig seizoen neet zomѐr veurbie te laote goan. Sjus wie veurig joar zulle veer auch weer zo veul wie meugelik in nauw euverleg met al ozze angere Baekse vereiniginge same probere op te trekke. Ongertusje hubbe dr auch get veranderinge plaats gevonge in de road en in ut besjtuur. Sins ut letste normale seizoen hubbe veer toch twea nuuj roadslede moage verwelkomme! Dat zeen Patrick Simon en Kevin Schraven, hopelik kenne die twea sjnel mitmake woa ze eigelik veur geteikend hubbe 😉. Helaas zeen veer d’r auch eine kwiet geraak; Patrick de Klerk heat aangegeave zien fokus te goan verlegge op zien andere passie neave de vastelaovend; Dutchbricks (de NL-LEGO vereiniging veur de leke onger os). Veer wunsje Patrick dan auch veul sukses en plezeer en met ziene gedreveheid zal dat vast good komme! Doarom zeen veer dan auch op zeuk noa unnen nuuje veurzitter dea zich foeltaaim in wil goan zette veur os vereiniging. In de tusje-tied hubbe de euverige besjtuurslede al hun take op unnen haup gegooid en opnuuj verdeild. Richard zal ut veurzittersjap (a.i.) tot d’r unne nuuje veurzitter is, op zich numme en Rob zal dan zolang de besjtuurvergaderinge leije. Karlijn en Ton blieve same ut penningmeistersjap behere/bevrouwe. Veur de euverige take en kontakte verwies ich uch noa de websaait. Dus es geer emes weit of zelf missjien waal veurzitter wil weare dan meld uch bie ein van de besjtuursleje. Hauwt de kommende tied de sosjaal-media mer in de gate want doa zulle veer sjnel updeets geave euver wat de toekoms geit bringe, wat veer goan doon met ozze bevroare prinse Rob III en Jesse I en nuuje hooghede. Names ut besjtuur. Blief gezondj en tot sjnel


Karlijn, Ton, Rob & Richard



65 weergaven0 opmerkingen

Recente blogposts

Alles weergeven